Мадриднинг «Реал» клуби чап қанот ҳимоячиси Ферлан Менди Чемпионлар лигаси чорак финали доирасида «Бавария»га қарши кечадиган дастлабки ўйингача тикланишга улгурмайди.
Учрашув 7 апрель куни «Сантьяго Бернабеу» стадионида бўлиб ўтади. ESPN нашрининг хабар беришича, французнинг ушбу баҳсда иштирок этиши деярли истисно қилинган. Клуб 30 ёшли футболчининг 15 апрель куни Мюнхенда ўтказиладиган жавоб учрашувига қадар сафга қайтишига умид қилмоқда.
Ферлан Менди охирги марта 11 март куни майдонга тушган эди — ўшанда у «қаймоқранглилар»га Чемпионлар лигаси 1/8 финали доирасидаги «Манчестер Сити»га қарши ўз уйидаги баҳсда (3:0) ғалаба қозонишга ёрдам берганди. Навбатдаги жароҳат туфайли латераль кейинги тўртта ўйинни ўтказиб юборди.
