Ҳакам Майкл Оливер Чемпионлар Лигаси 1/4 финалидан ўрин олган "Реал" ва "Бавария" жамоалари ўртасидаги дастлабки ўйинга тайинланди. Учрашув сешанба куни "Сантьяго Бернабеу" стадионида бўлиб ўтади.
Оливерга қанотларда Стюарт Берт ва Жеймс Мэйнуоринг ёрдам беришади. Тўртинчи ҳакам – Эндрю Мэдли. Видеоёрдамчи ҳакам (VAR) – Жарред Жиллетт, унинг ёрдамчиси эса италиялик Марко Ди Белло бўлади. Бу Оливер учун "Реал" иштирокидаги еврокубоклардаги бешинчи ўйин бўлади.
Бунгача у мадридликларнинг ЕЧЛ-2017/18 чорак финалида "Ювентус"га қарши (1:3), 2022 йилги УЕФА Суперкубогида "Айнтрахт" билан (2:0), ЕЧЛ-2023/24 гуруҳ босқичида "Брага"га қарши (2:1), шунингдек, жорий евромавсумда "Олимпиакос" билан (4:3) кечган баҳсларида ишлаган.
Шу билан бирга, УЕФА сешанба кунги бошқа бир чорак финал учун ҳам тайинловларни эълон қилди. "Спортинг" ва "Арсенал" ўртасидаги ўйинни германиялик Даниэль Зиберт бошқариб боради.
Унга Ян Зайдель ва Рафаэль Фольтин ёрдам беради, захира ҳаками сифатида Даниэль Шлагер ишлайди. VAR учун Бастиан Данкерт, унинг ёрдамчиси сифатида эса Серен Шторкс масъул бўлади.
Биринчи ўйин Лиссабонда бўлиб ўтади, жавоб учрашуви эса 15 апрель куни Лондонга белгиланган.
