"Манчестер Сити" Англия Кубоги чорак финалида "Ливерпуль"ни тор-мор келтирди. "Шаҳарликлар" ўзларининг принципиал рақиби дарвозасига жавобсиз тўртта гол урди, Эрлинг Холанд эса хет-трик қайд этди.
Бироқ учрашувнинг асосий қаҳрамони фақат норвегиялик ҳужумчи бўлиб қолмади – экспертлар "Манчестер Сити" ҳимоячиси Абдуқодир Ҳусановнинг ишончли ўйинини ҳам алоҳида эътироф этишди. SportsMole нашри берган маълумотларга кўра, 22 ёшли марказий ҳимоячи учрашувнинг энг яхши футболчиларидан бирига айланди.
"Ливерпуль"га қарши баҳсда Ҳусанов барча ҳаводаги курашларда ва майдондаги тўртта яккакурашда ғолиб чиқди. Бундан ташқари, унинг ҳисобида тўртта тўпни олиб қўйиш ва тўртта тўпни узоқлаштириш мавжуд. Ўзбекистонлик футболчи, шунингдек, узатмаларнинг 93 фоизини аниқ амалга оширди ва тўрт марта жамоасига тўпни қайтариб берди.
Экспертлар Ҳусановнинг Муҳаммад Салоҳ берган зарбани блоклаб, "Ливерпуль" юлдузига "Манчестер Сити" дарвозасини ишғол қилишга йўл қўймаган вазиятини алоҳида қайд этишди.
