«Интер Майами» ҳаммуассиси Дэвид Бекхэм жамоаси 4 апрель куни янги «Ну» стадионида илк ўйинини ўтказганидан сўнг, ушалмай қолган орзулари ҳақида сўзлаб берди. «Остин» клубига қарши кечган баҳс 2:2 ҳисобидаги дуранг билан якунланди.
«Бундан 20 йил аввал Америкага ва MLS’га келганимда, асосий орзум — чемпионликларни қўлга киритиш, ўзим севган футболни ривожлантиришга ҳисса қўшиш ва шахсий жамоамни ташкил этиш эди. 13 йил олдин танловим Майами эканлигини эълон қилгандим. У пайтда на номимиз, на мухлисларимиз ва на стадионимиз бор эди. Бугун эса мен янги уйимизда турибман. Биз MLS чемпионларимиз. Таркибимизда тарихдаги энг яхши футболчи ўйнаяпти. Орзулар ҳақиқатан ҳам амалга ошар экан», — дея Бекхэмнинг сўзларидан иқтибос келтиради ESPN.
Бундан аввал жамоа ўз уй учрашувларини Майамидан тахминан 40 километр шимолда жойлашган Форт-Лодердейл шаҳрида ўтказишга мажбур эди. Қурилиши 2023 йилнинг августида бошланган янги арена 26 700 томошабинга мўлжалланган.
