Мюнхеннинг «Бавария» клуби бош мураббийи Венсан Компани Чемпионлар Лигаси чорак финалининг биринчи ўйини олдидан Мадриднинг «Реал» клуби ҳужумчилари Килиан Мбаппе ва Винисиус Жуниор ҳақидаги саволга жавоб берди.
— «Реал» Мбаппе ва Винисиус билан бирга кучлироқ ўйнайдими ёки уларнинг фақат биттаси биланми?
— Бу умуман менинг устувор вазифам эмас. «Бавария»нинг ўз муаммолари етарли, биз «Реал»нинг муаммоларини ҳал қилишимиз шарт эмас. Фақат шуни айтишим мумкинки, иккаласи ҳам — ақл бовар қилмас даражадаги футболчилар. Қолгани — «Реал»нинг иши, — дея Компанининг сўзларини келтирмоқда AS.
«Бавария» ва «Реал» ўртасидаги чорак финалнинг дастлабки учрашуви бугун, 7 апрель куни Мадриддаги «Сантьяго Бернабеу» стадионида бўлиб ўтади. Ўйин Тошкент вақти билан тунги соат 00:00'да бошланади.













