«Манчестер Юнайтед» ҳимоячиси Харри Магуайр клуб билан янги келишувга имзо чекканидан кейин ўз фикрлари билан ўртоқлашди. Аввалроқ «қизил иблислар» 33 ёшли футболчи билан ҳамкорликни яна бир йилга узайтирилганини расман эълон қилган эди.
«Манчестер Юнайтед» шарафини ҳимоя қилиш — бу энг олий шараф. Бу мен ва оилам ҳар куни фахрланадиган масъулиятдир. Ушбу ақл бовар қилмас клубда қолишим узайтирилганидан хурсандман. Жамоадаги ҳар бир инсон совринлар учун курашишга аҳд қилган ва ишончим комил — бизнинг энг яхши лаҳзаларимиз ҳали олдинда», — дея Магуайрнинг сўзларини келтирмоқда манкунианликлар матбуот хизмати.
Ҳозирда «Манчестер Юнайтед» АПЛ турнир жадвалида 31 турдан сўнг 55 очко билан учинчи ўринни эгаллаб турибди. Жамоани олдинда 13 апрель куни «Лидс»га қарши муҳим баҳс кутмоқда.
