"Бавария"нинг собиқ футболчиси Маркус Баббель Мадриднинг "Реал" клубини аёвсиз танқид остига олди.

"Реал" — Европадаги энг нафратли клуб ва "Бавария" кейинги босқичга чиқса, жуда яхши бўларди. Менинг фикримча, "Реал"нинг сўнгги йиллардаги ўзини тутиши мутлақо спортга зид. Бунинг "ҳалол ўйин" (fair play) билан ҳеч қандай алоқаси йўқ. Менда шундай таассурот борки, улар ўзларини ҳаммадан устун қўйишади ва қолганлардан яхшироқ деб ўйлашади. Бу мени чиндан ҳам ғазаблантиради ва улардан нафратланишга мажбур қилади.

"Бавария" агар ўз футболчиси совринни қўлга киритмаса, "Олтин тўп" маросимини ҳеч қачон бойкот қилмаган бўларди. Бу — барчага нисбатан ҳурматсизлик. Мен "Реал"нинг бундай ҳаракатини жирканч деб ҳисоблайман", — деди Баббель Sky 90 эфирида.

Сешанба куни Чемпионлар лигаси 1/4 финалининг дастлабки учрашувида "Реал" ўз майдонида "Бавария"ни қабул қилади.