Дунёнинг иккинчи ракеткаси, тўрт карра “Катта дубулға” турнирлари ғолиби Янник Синнер профессионал фаолиятидаги навбатдаги тарихий натижани қайд этди. 7 апрель куни италиялик теннисчи 2026-йилги мавсум бошланганидан буён Masters сериясига кирувчи турнирларда ўзининг кетма-кет 13-ғалабасини тантана қилди.

Синнер ўзининг 13-ғалабасини Монте-Карло (Монако) шаҳрида ўтаётган грунт қопламали турнирнинг иккинчи даврасида қўлга киритди. Дунё рейтингида 34-ўринни эгаллаб турган франциялик Уго Умберга қарши кечган баҳсда Янник рақибига ҳеч қандай имконият қолдирмади ва 6:3, 6:0 ҳисобида зафар қучди.

Opta Аcе статистик порталига кўра, Синнер 2017-йилдан бери мавсумни Masters турнирларини кетма-кет 13 та ғалаба билан бошлаган илк теннисчига айланди. Сўнгги бор бундай натижани 2017-йилда афсонавий Рожер Федерер қайд этган эди.

Эслатиб ўтамиз, аввалроқ Янник Синнер фаолияти давомида 60 миллион доллар мукофот пули ишлаб топган тарихдаги 8-теннисчига айлангани ҳақида хабар берилган эди. Шунингдек, у март ойида АҚШнинг Маями шаҳрида ўтказилган Masters турнири финалида чехиялик Иржи Леҳечкани мағлуб этиб, мавсумдаги навбатдаги совринига эга чиққан эди.