Мадриднинг "Реал" клуби машҳур руминиялик мураббий Мирча Луческунинг вафоти муносабати билан ҳамдардлик билдирди. Мутахассис сешанба куни, 80 ёшида ҳаётдан кўз юмди.
"Биз Мирча Луческунинг вафотидан чуқур қайғудамиз. 'Реал' унинг оила аъзолари ва яқинларига ҳамдардлик изҳор этади. Охиратингиз обод бўлсин", — дейилади "қироллик клуби" матбуот хизмати томонидан эълон қилинган хабарда.
Луческу Россия чемпионатида Санкт-Петербургнинг "Зенит" клубидаги фаолияти билан танилган. Бундан ташқари, у Миланнинг "Интер", Туркиянинг "Бешиктош" ва "Галатасарой", Донецкнинг "Шахтёр" ҳамда Киевнинг "Динамо" каби клубларини бошқарган. Шунингдек, у Туркия ва Руминия миллий терма жамоаларига ҳам раҳбарлик қилган.
