«Реал» дарвозабони Андрей Лунин мадридликлар «Бавария» билан жавоб учрашувида вазиятни ўнглай олишига ишонади.

Чемпионлар Лигаси 1/4 финалининг дастлабки ўйинида «Реал» ўз уйи «Сантьяго Бернабеу»да 1:2 ҳисобида имкониятни бой берди.

«Биз гол ўтказиб юборишдан қочишимиз мумкин эди, аммо жамоа яхши реакция кўрсатди. Агар Нойер ўйиннинг энг яхши футболчиси деб топилган бўлса, демак биз кўп ҳужум қилганмиз. Биз ҳали курашдамиз. Ҳар доим вазиятни яхши томонга ўзгартириш имкони бор. Жавоб ўйини янада қийинроқ кечади, лекин биз ўзимизга ишонамиз. Бу — Чемпионлар Лигаси чорак финали. Ҳар қандай ҳолатда ҳам осон бўлмаслигини билардик.

Маълум пайтларда паст блокда ҳимояланишга мажбур бўлишимизни билардик. Тўпга эгалик қилган вақтимизда эса биз ҳам устунлик қилишни хоҳладик.

Жавоб ўйинида гол уришга ва дарвозамиз дахлсизлигини сақлашга ҳаракат қилишимиз керак. Кўрамиз, вазиятни ўзгартира олармиканмиз», – деди Лунин.