«Real» darvozaboni Andrey Lunin madridliklar «Bavariya» bilan javob uchrashuvida vaziyatni o‘nglay olishiga ishonadi.

Chempionlar Ligasi 1/4 finalining dastlabki o‘yinida «Real» o‘z uyi «Santyago Bernabeu»da 1:2 hisobida imkoniyatni boy berdi.

«Biz gol o‘tkazib yuborishdan qochishimiz mumkin edi, ammo jamoa yaxshi reaksiya ko‘rsatdi. Agar Noyer o‘yinning eng yaxshi futbolchisi deb topilgan bo‘lsa, demak biz ko‘p hujum qilganmiz. Biz hali kurashdamiz. Har doim vaziyatni yaxshi tomonga o‘zgartirish imkoni bor. Javob o‘yini yanada qiyinroq kechadi, lekin biz o‘zimizga ishonamiz. Bu — Chempionlar Ligasi chorak finali. Har qanday holatda ham oson bo‘lmasligini bilardik.

Ma’lum paytlarda past blokda himoyalanishga majbur bo‘lishimizni bilardik. To‘pga egalik qilgan vaqtimizda esa biz ham ustunlik qilishni xohladik.

Javob o‘yinida gol urishga va darvozamiz daxlsizligini saqlashga harakat qilishimiz kerak. Ko‘ramiz, vaziyatni o‘zgartira olarmikanmiz», – dedi Lunin.