Ўзбекистон Профессионал футбол лигаси (ЎзПФЛ) Суперлиганинг 6-тури доирасида ўтказилган “Андижон” — “Навбаҳор” (0:1) учрашувидаги тартибсизликлар ва ҳакамлик масаласида расмий муносабат билдирди.
7 апрель куни бўлиб ўтган водий дербисида ўйин регламенти билан тартибга солинадиган қоидаларнинг бузилиши қайд этилган. Учрашувдан кейин Лига расмийлардан мазкур вазиятлар юзасидан билдирги кутган. Бироқ комиссар ҳисоботидан ташқари, бош ҳакам ва тўртинчи ҳакам томонидан мезбонлар захира ўриндиғида юзага келган ҳолатлар бўйича расмий қайд киритилмагани маълум бўлди.
Учрашувнинг 55-дақиқасида “Андижон” бош мураббийи Самвел Бабаян ҳакам қарорларига билдирган эътирози учун сариқ карточка олди. Эътиборлиси, мутахассис аввалроқ – 3 март куни бўлиб ўтган Тартиб-интизом қўмитаси йиғилишида ҳам интизомий жазога тортилган. Шунга қарамай, у “Навбаҳор”га қарши баҳсда техник зона қоидаларини бир неча бор бузган: белгиланган ҳудуддан чиқиб кетган, эътироз сифатида тўпни майдонга улоқтирган ҳамда ҳакамлар билан тортишувларга киришган.
Мазкур ҳолатлар майдондаги вазиятга ҳам таъсир ўтказиб, ўйин давомида асабий эпизодларнинг кўпайишига сабаб бўлди.
Лига баёнотида қайд этилишича, барча клублар бош мураббийлари учун ягона тартиб ва талаблар амал қилади. Эмоциялар футболнинг ажралмас қисми сифатида қабул қилинса-да, қўмита қарорларига ва амалдаги қоидаларга нисбатан ҳурматсизликка йўл қўйилмайди.
Шунингдек, Лига Ўзбекистон футбол ҳакамлари марказидан мазкур учрашув ҳакамлиги бўйича расмий тушунтириш талаб қилган. Текширув комиссар ҳисоботлари ва трансляция тасвирлари асосида олиб борилади. Айрим эпизодларда бош ҳакам ва захира ҳаками ўйинни тўлиқ назорат қила олмагани, вазиятларни тартибга солишда етарли чоралар кўрмагани таъкидланган.
Қайд этилишича, учрашувда ишлаган реферилар ўйин натижасига бевосита таъсир қилган қўпол хатоларга йўл қўймаган. Бироқ айрим эпизодлар учрашув тақдирига таъсир кўрсатиши мумкин бўлган даражада баҳсли бўлган.
Лига стадиондаги атмосфера ва ташкилий жараёнларни ижобий баҳолади. Шу билан бирга, мухлислар учун сифатли ва томошабоп футболни таъминлаш мақсадида ўйин давомида баҳсли, кўнгилсиз ҳолатлар ҳамда ташқи аралашувларни максимал даражада камайтириш устувор вазифа экани таъкидланган.
