O‘zbekiston Professional futbol ligasi (O‘zPFL) Superliganing 6-turi doirasida o‘tkazilgan “Andijon” — “Navbahor” (0:1) uchrashuvidagi tartibsizliklar va hakamlik masalasida rasmiy munosabat bildirdi.
7 aprel kuni bo‘lib o‘tgan vodiy derbisida o‘yin reglamenti bilan tartibga solinadigan qoidalarning buzilishi qayd etilgan. Uchrashuvdan keyin Liga rasmiylardan mazkur vaziyatlar yuzasidan bildirgi kutgan. Biroq komissar hisobotidan tashqari, bosh hakam va to‘rtinchi hakam tomonidan mezbonlar zaxira o‘rindig‘ida yuzaga kelgan holatlar bo‘yicha rasmiy qayd kiritilmagani ma’lum bo‘ldi.
Uchrashuvning 55-daqiqasida “Andijon” bosh murabbiyi Samvel Babayan hakam qarorlariga bildirgan e’tirozi uchun sariq kartochka oldi. E’tiborlisi, mutaxassis avvalroq – 3 mart kuni bo‘lib o‘tgan Tartib-intizom qo‘mitasi yig‘ilishida ham intizomiy jazoga tortilgan. Shunga qaramay, u “Navbahor”ga qarshi bahsda texnik zona qoidalarini bir necha bor buzgan: belgilangan hududdan chiqib ketgan, e’tiroz sifatida to‘pni maydonga uloqtirgan hamda hakamlar bilan tortishuvlarga kirishgan.
Mazkur holatlar maydondagi vaziyatga ham ta’sir o‘tkazib, o‘yin davomida asabiy epizodlarning ko‘payishiga sabab bo‘ldi.
Liga bayonotida qayd etilishicha, barcha klublar bosh murabbiylari uchun yagona tartib va talablar amal qiladi. Emosiyalar futbolning ajralmas qismi sifatida qabul qilinsa-da, qo‘mita qarorlariga va amaldagi qoidalarga nisbatan hurmatsizlikka yo‘l qo‘yilmaydi.
Shuningdek, Liga O‘zbekiston futbol hakamlari markazidan mazkur uchrashuv hakamligi bo‘yicha rasmiy tushuntirish talab qilgan. Tekshiruv komissar hisobotlari va translyasiya tasvirlari asosida olib boriladi. Ayrim epizodlarda bosh hakam va zaxira hakami o‘yinni to‘liq nazorat qila olmagani, vaziyatlarni tartibga solishda yetarli choralar ko‘rmagani ta’kidlangan.
Qayd etilishicha, uchrashuvda ishlagan referilar o‘yin natijasiga bevosita ta’sir qilgan qo‘pol xatolarga yo‘l qo‘ymagan. Biroq ayrim epizodlar uchrashuv taqdiriga ta’sir ko‘rsatishi mumkin bo‘lgan darajada bahsli bo‘lgan.
Liga stadiondagi atmosfera va tashkiliy jarayonlarni ijobiy baholadi. Shu bilan birga, muxlislar uchun sifatli va tomoshabop futbolni ta’minlash maqsadida o‘yin davomida bahsli, ko‘ngilsiz holatlar hamda tashqi aralashuvlarni maksimal darajada kamaytirish ustuvor vazifa ekani ta’kidlangan.
