Ўзбекистон Суперлигасининг 6-туридан ўрин олган учрашувда «Қўқон-1912» ўз майдонида «Насаф»ни қабул қилди. Кескин ва воқеаларга бой ўтган баҳс 1:1 ҳисобида якунланди.

Ўйиннинг илк дақиқаларида ташаббус мезбонлар томонида бўлди. Қўқонликлар бир қатор хавфли ҳужумлар уюштирди — Гулямов ва Гадоевнинг зарбалари рақиб дарвозасига хавф солди, аммо ҳисоб очилмади. Биринчи бўлим давомида мезбонлар устун кўринган бўлса-да, улар ўз имкониятларидан фойдалана олмади.

Иккинчи бўлимда эса ўйин манзараси ўзгарди. 54-дақиқада «Насаф» ҳимоядаги хатодан фойдаланиб ҳисобни очди. Бобур Абдухолиқов мавсумдаги илк голини урди — 0:1.

Шундан сўнг «Қўқон-1912» ҳужумларни кучайтирди. Нимели, Маликжонов ва бошқа футболчилар бир неча бор хавфли вазиятлар яратди, бироқ омад етишмади.

Учрашувнинг энг драматик лаҳзалари сўнгги дақиқаларга тўғри келди. VAR орқали кўриб чиқилган эпизоддан сўнг мезбонлар фойдасига пенальти белгиланди. Шу вазиятда «Насаф» бош мураббийи Рўзқул Бердиев ҳакам билан баҳслашгани учун қизил карточка олди.

88-дақиқада Томa Табатадзе пенальтини аниқ ижро этиб, ҳисобни тенглаштирди — 1:1. Қўшимча дақиқаларда ҳар икки жамоа ғалаба учун ҳаракат қилди, бироқ ҳисоб ўзгармади.

Шу тариқа, драматик руҳда ўтган учрашувда жамоалар очколарни бўлишиб олди. "Насаф"нинг очколари 11 тага, "Қўқон-1912"ники эса 6 тага етди.

Ўзбекистон Суперлигаси, 6-тур
8 апрель 2026 йил.
«Қўқон-1912» — «Насаф» 1:1
Голлар: Бобур Абдухолиқов, 54 (0:1), Тома Табатадзе, 88 (1:1, пенальти)
Четлатиш: Рўзиқул Бердиев, 85 (Насаф)