«Ювентус» дарвозабони Микеле ди Грегорио, эҳтимол, клубдаги сўнгги ойларини ўтказмоқда.

Қишда бир қатор ишончсиз ўйинлардан сўнг, дарвозабон «кекса синьора»нинг асосий таркибидаги жойини йўқотган эди. Яқинда италиялик посбон майдонга қайтди ва ҳатто «Женоа»га қарши баҳсда (2:0) пенальтини қайтаришга ҳам муваффақ бўлди, шунга қарамай, клуб раҳбарияти барибир уни сотиш фикрида қолмоқда. La Gazzetta dello Sport нашрининг хабар беришича, «Ювентус» мутасаддилари келаётган ёзда 28 ёшли ўйинчи билан хайрлашишни режалаштирмоқда. Ҳозирданоқ Англия Премьер-лигаси вакиллари унга қизиқиш билдиришмоқда, бироқ аниқ даъвогарлар номи ҳозирча ошкор қилинмаган.

Transfermarkt портали баҳосига кўра, Микеле ди Грегорионинг бозор қиймати 14 миллион еврони ташкил этади, унинг шартномаси эса 2029 йилгача амал қилади.