«Марсель» хўжайини Фрэнк Маккорт «Велодром» стадионига француз журналистларини йиғиб, Стефан Ришар клубнинг янги президенти этиб тайинланганини расман эълон қилди. Бу ҳақда GFFN нашри хабар бермоқда.
Франция бизнес оламида 30 йиллик тажрибага эга ва ҳаётининг муайян қисмини Марселда ўтказган Ришар ушбу лавозимда Пабло Лонгорияни алмаштиради. Франциялик мутахассис ўз вазифасини бажаришга шу йилнинг июль ойидан киришади.
«Марселга ижро ҳокимияти соҳасида тажрибага эга кучли етакчи керак — айниқса, француз футболида муаммолар кўпайган ҳозирги вақтда», — деди Маккорт жума куни эрталаб ўтказилган матбуот анжуманида.
Клубнинг янги президенти аллақачон баёнот беришга улгурди: у клуб ва мухлислар ўртасидаги кескин муносабатларни юмшатиш ниятида эканлигини таъкидлади.
Ҳозирда «Марсель» Франция чемпионати турнир жадвалида 28 ўйиндан сўнг 49 очко билан тўртинчи ўринда бормоқда.
