«Marsel» xo‘jayini Frenk Makkort «Velodrom» stadioniga fransuz jurnalistlarini yig‘ib, Stefan Rishar klubning yangi prezidenti etib tayinlanganini rasman e’lon qildi. Bu haqda GFFN nashri xabar bermoqda.
Fransiya biznes olamida 30 yillik tajribaga ega va hayotining muayyan qismini Marselda o‘tkazgan Rishar ushbu lavozimda Pablo Longoriyani almashtiradi. Fransiyalik mutaxassis o‘z vazifasini bajarishga shu yilning iyul oyidan kirishadi.
«Marselga ijro hokimiyati sohasida tajribaga ega kuchli yetakchi kerak — ayniqsa, fransuz futbolida muammolar ko‘paygan hozirgi vaqtda», — dedi Makkort juma kuni ertalab o‘tkazilgan matbuot anjumanida.
Klubning yangi prezidenti allaqachon bayonot berishga ulgurdi: u klub va muxlislar o‘rtasidagi keskin munosabatlarni yumshatish niyatida ekanligini ta’kidladi.
Hozirda «Marsel» Fransiya chempionati turnir jadvalida 28 o‘yindan so‘ng 49 ochko bilan to‘rtinchi o‘rinda bormoqda.
