Ҳужумчи Габриэл Мартинелли фаолиятини «Арсенал»да давом эттиришни истамоқда.
Football Insider нашрининг хабарига кўра, бразилиялик футболчи ёзда сотилиши мумкинлиги ҳақидаги миш-мишлар ва клуб томонидан берилган ишораларга қарамай, Лондонда қолишга интилмоқда. Ҳужумчининг «Арсенал» билан амалдаги шартномаси 2027 йилнинг 30 июнига қадар мўлжалланган. Шу сабабли у раҳбарият ва мураббийлар штабига Микель Артета жамоасида ҳали ҳам муҳим фигура бўла олишини исботламоқчи.
Эслатиб ўтамиз, Габриэл Мартинелли 2019 йилда «Итуано» клубидан етти миллион евро эвазига «Арсенал»га ўтган эди. Жорий мавсумда ҳужумчи лондонликлар сафида барча турнирларда 44 та ўйин ўтказиб, 11 та гол урди ва 6 та голли узатмани амалга оширди.
