«Челси» бош мураббийи Лиам Росеньор ярим ҳимоячи Энцо Фернандеснинг кечирим сўраганига қарамай, Англия Премьер-лигасининг 32-туридан ўрин олган «Манчестер Сити»га қарши баҳсда майдонга тушмаслигини маълум қилди. Учрашув якшанба, 12 апрель куни бўлиб ўтади.
«Мен Энцо билан уч-тўрт марта жуда яхши суҳбатлашдим. У мендан ва клубдан кечирим сўради. Биз бу масалани якшанба кунги муҳим ўйиндан кейин ҳал қиламиз.
Бу жуда жиддий масала бўйича жиддий учрашув эди. Ҳар қандай ҳолатда ҳам мен Энцонинг характерига ёки шахсиятига шубҳа қилмайман. Инсонлар хато қилишига ишонаман. Лекин қилинган хато учун жазони бекор қилиб бўлмайди. Мен Энцонинг бундан кейин ажойиб фаолият юритишини истайман», — дея Росеньорнинг сўзларини келтирмоқда ESPN.
Эслатиб ўтамиз, аргентиналик ярим ҳимоячи фаолиятини Мадриднинг «Реал» клубида давом эттириш вариантини кўриб чиқишга тайёр эканлигини айтганидан сўнг «Челси» ўйинларидан четлатилган эди.
Жорий мавсумда Энцо Фернандес «Челси» сафида барча мусобақаларда 46 та ўйинда иштирок этиб, 12 та гол ва 6 та голли узатмани амалга оширди.
