«Ал-Аҳли» клуби ҳакамлар Криштиану Роналду тўп сураётган «Ан-Наср» жамоасига ён босаётгани ва уларнинг Саудия Арабистони чемпионатида ғолиб чиқишига ёрдам бераётгани ҳақида гумон қилмоқда. Бу ҳақда Footmercato нашри ижтимоий тармоқлардаги саҳифаси орқали хабар берди.

Аввалроқ «Ал-Аҳли» Про-лиганинг 29-тури доирасидаги «Ал-Фейха»га қарши ўйиндаги (1:1) ҳакамликни расман қоралаган эди. Клубнинг ижтимоий тармоқдаги баёнотида шундай дейилади:

«Ал-Аҳли» 29-турдаги «Ал-Фейха» билан ўйинда натижага таъсир қилган ҳакамлик хатоларидан чуқур норозилик билдиради. Ҳакамнинг қарорлари ўйин жараёнига ва жамоамизнинг чемпионлик учун курашдаги мавқеига жиддий таъсир кўрсатди.

Бундай хатолар ҳакамларни танлаш жараёни ва қўлланилаётган мезонлар борасида ҳақли хавотирларни келтириб чиқармоқда. Адолатсиз қарорлар мусобақа ривожига ҳисса қўшмайди ва ҳар қандай турнир асосида ётиши керак бўлган ҳалол ўйин принципларига зиддир.

«Ал-Аҳли» раҳбарияти ҳакамлар ва VAR ассистентлари ўртасидаги суҳбат ёзувларини, шунингдек, уларнинг футболчилар билан мулоқотларини тақдим этишни талаб қилмоқда. Бундан ташқари, клуб баҳсли вазиятлар бўйича аниқ тушунтириш берилишини сўраган.

Якунда клуб мутасадди ташкилотлар Саудия Про-лигаси нуфузини ҳимоя қилиш учун зарур чораларни кўришига ишонч билдирган.

Ҳозирда «Ал-Аҳли» 66 очко билан турнир жадвалида учинчи ўринни эгаллаб турибди. «Ан-Наср» эса битта захира ўйинига эга бўлган ҳолда 70 очко билан пешқадамлик қилмоқда.