«Барселона» бош мураббийи Ханс-Дитер Флик Чемпионлар лигасида «Атлетико»дан учралган мағлубиятдан (0:2) сўнг, клуб томонидан УEФАга ҳакамлик устидан йўлланган шикоят борасида ўз фикрини билдирди.

— УEФАга ҳакамлик бўйича йўлланган расмий шикоят бирор натижа беради деб ўйлайсизми? — дея савол берилди Фликка матбуот анжуманида.

— Қандай натижага эришишимизни билмайман. Мен ва жамоа учун энг муҳими — клуб бизни бу масалада қўллаб-қувватлаётганидир, чунки ўша вазиятда адолатсизлик бўлди. Бир марта хато қилиш мумкин, лекин икки марта эмас. Клубнинг дастаги биз учун жуда муҳим.

Эслатиб ўтамиз, иккинчи бўлим бошида ҳисоб 0:1 бўлиб турган вақтда, «Атлетико» ҳимоячиси тўп ўйинга киритилган бўлишига қарамай, дарвозабон майдончаси чизиғи устида тўпни қўли билан ўйнаган эди. Бош ҳакам эса пенальти белгиламасликка қарор қилган.

«Атлетико» ва «Барселона» ўртасидаги жавоб учрашуви 14 апрель куни бўлиб ўтади.