Мадриднинг «Реал» клуби лазаретида бўлиб турган бельгиялик дарвозабон Тибо Куртуа жароҳатидан тикланишда давом этмоқда. Ўтган ойнинг ўрталарида голкипер ўнг сонидан жароҳат олган эди.
The Athletic журналистларининг маълумотларига кўра, юлдуз футболчи шу ойнинг охирида майдонга қайтиши мумкин. Агар «қаймоқранглилар» еврокубокнинг ушбу босқичига йўлланма олсалар, Куртуа УЕФА Чемпионлар лигаси ярим финалида иштирок этиши эҳтимолдан холи эмас.
Чорак финалнинг дастлабки учрашувида «қироллик клуби» ўз уйида Мюнхеннинг «Бавария» жамоасига 1:2 ҳисобида имкониятни бой берди. Жавоб ўйини келгуси ҳафта Германияда бўлиб ўтади.
