Ўзбекистон ёшлар биринчилигининг 17-туридан ўрин олган “Навбаҳор” – “Динамо” учрашуви якунига етди. Самарқандликларга қарши баҳсда ёшларимиз навбатдаги ғалабани қўлга киритиб, мусобақа жадвалидаги мавқеларини яхшилаб олишди. Эътиборли жиҳати наманганликлар қаторасига учинчи учрашувни ҳам ғалаба билан якунлашмоқда.

Учрашув давомида ёшларимиз устунликка эга бўлишди. Агарда футболчиларимиз рақиб дарвозаси олдида юзага келтирилган вазиятларнинг барчасидан самарали фойдаланишни уддасидан чиққанларида ҳисоб йирик кўриниш олиши ҳам мумкин эди. Хусусан биринчи бўлимда Абдураззоқ Жўраев ва Азизбек Турғунбоев имкониятларни голга айлантирганларида ҳисоб танаффусга қадар очилган бўларди.

Иккинчи бўлимни ҳам ҳужумкор руҳда бошлаган "Навбаҳор" ёшлари тез орада ҳисобни очишга эришишди. Давралар оралиғида “Пахтакор”дан таклиф этилган Оятулло Муҳиддинов Собир Ҳамидовнинг тўп оширишидан кейин ўнг қанотдан жарима майдончасига ёриб кириб, ўткир бурчак остида бўлишига қарамай дарвозани ишғол қилишни уддалади. Қолган вақт давомида футболчилар ҳарчанд уринмасинлар 1:0 ҳисобини ўзгартириш ҳеч кимга насиб этмади. Ушбу ғалабадан кейин очколар сонини 25 тага етказиб олишди. Бу эса "Навбаҳор"га кучли олтиликдан муқим жой олиш имкониятини яратиб берди.

“Навбаҳор” – “Динамо” – 1:0 (0:0). 24 август. Косонсой.
Ҳакам – Т.Тўхтасинов.
Назоратчи – Ғ.Каримов.
“Навбаҳор”: Ислом Жўраев (Виктор Мочалов, 46), Ботир Тўрабоев, Дурбек Умаралиев (Мухсин Манавихонов, 80), Мирзоҳид Собиров, Раҳмон Ўринов, Собит Воҳидов (Акбаршо Рашидханов, 69), Собир Ҳамидов (Абдуазиз Султанов, 55), Абдураззоқ Жўраев (Илҳом Бойдедаев, 46), Азизбек Турғунбоев (Оятулло Муҳиддинов, 46), Аъзам Алиев, Билол Шарофиддинов (Ислом Исмоилов, 46).
Гол: Оятулло Муҳиддинов (55).