«Ювентус» бош мураббийи Лучано Спаллетти Чемпионлар лигаси йўлланмаси учун кечаётган кураш ҳақида ўз фикрларини билдирди.

Шанба куни туринликлар «Аталанта» устидан кичик ҳисобда ғалаба қозониб, А Серия турнир жадвалида тўртинчи ўринга кўтарилиб олишди.

«Менинг фикримча, «Ювентус» каби жамоаларсиз Чемпионлар лигаси ўз жозибасини йўқотади. Бу ерда гап фақат трансферлар учун зарур бўлган маблағда эмас, балки турнирнинг ўзида иштирок этиш факторида. Биз келаси мавсумни Чемпионлар лигасисиз ўтказишни истамаймиз», – деди яқинда «кекса синьора» билан шартномасини узайтирган Спаллетти матбуот анжуманида.

Агар бугун икки очко ортда қолаётган «Комо» ўз майдонида Миланнинг «Интер» клубини мағлуб этса, «Ювентус» яна бешинчи ўринга тушиб қолади.