Лондоннинг «Арсенал» клуби футболчиси Леандро Троссард жамоасининг «Брентфорд»дан учраган мағлубияти (1:2) ҳақида фикр билдирди.
«Тўпчилар» Премьер-лиганинг шанба кунги баҳсида ўз майдонларида кутилмаганда «асаларилар»га имкониятни бой беришди.
«Бундай натижадан барчамизнинг ҳафсаламиз пир бўлди. Бу муҳим ўйин эди, аммо энди ҳеч нарсани ўзгартириб бўлмайди. Ягона йўл — хатолардан хулоса чиқариш ва олдинга интилиш. Таркибимизда жароҳатлар билан боғлиқ муаммолар бор, бироқ биз баҳона қидирмаслигимиз керак. Бу сафар жамоамиз ўзининг одатий даражасини кўрсата олмади. Биз ҳали ҳам турнир жадвали юқорисидамиз, лекин ўз устимизда ишлашимиз шарт», — деди Троссар ўз интервьюсида.
«Арсенал» иккинчи ўриндаги «Манчестер Сити»дан тўққиз очко олдинда, бироқ «шаҳарликлар» ихтиёрида заҳирадаги иккита ўйин бор. Кейинги турда чемпионлик учун асосий даъвогарлар ўзаро тўқнаш келишади.
