Бугун Премьер-лиганинг 32-тури доирасида «Челси» ўз майдонида «Манчестер Сити»ни қабул қилади. Агар «шаҳарликлар» ғалаба қозонса, жадвалда пешқадамлик қилаётган «Арсенал» билан орадаги фарқни ўзаро ўйин олдидан 6 очкогача қисқартиришади. Шу билан бирга, Хосеп Гвардиола жамоасида яна битта захира ўйини мавжуд бўлади.
The Touchline нашрининг қайд этишича, кўплаб «Челси» мухлислари якшанба кунги баҳсда ўз жамоаларининг мағлубиятига рози бўлиб туришибди — буларнинг барчаси «Арсенал» чемпион бўлмаслиги учун. «Кўклар»нинг айрим ишқибозлари бугунги жангда рақибнинг ғалаба қозонишини чин дилдан исташмоқда.
«Арсенал» олис 2004 йилдан бери Англия чемпиони бўла олмаяпти. Охирги уч мавсумда «тўпчилар» мунтазам равишда иккинчи ўринни эгаллаб келишмоқда.
