«Пари Сен-Жермен» клуби яқин орада Усмон Дембеле билан янги шартнома борасида музокаралар ўтказишни режалаштирмаяпти.
L'Equipe нашрининг хабар беришича, томонлар муҳокамаларда танаффус қилишга қарор қилишган. Клуб ҳозир музокаралар учун қулай вақт эмас деб ҳисоблайди ва футболчи ҳам шу фикрда. «ПСЖ» учун яқин ойлардаги асосий устувор вазифа — Чемпионлар лигасида муваффақиятли иштирок этиш.
Шу билан бирга, манбанинг қайд этишича, Париж гранди раҳбарияти футболчи борасидаги позициясини қайта кўриб чиқиши мумкин: Чемпионлар лигасининг чорак финали ёки ярим финалидаги муваффақиятсизлик клубни таркибни янгилашга ва ёшроқ футболчиларга эътибор қаратишга ундаши эҳтимол.
Мавсумнинг биринчи ярмида ҳужумчи доимий жароҳатлардан азият чекди, бу ҳам шубҳалар пайдо бўлишига сабаб бўлди. Май ойида Усмон Дембеле 29 ёшга тўлади. Агар у «ПСЖ»ни тарк этса, фаолиятини давом эттириши учун энг эҳтимолий вариант Саудия Арабистони чемпионати бўлиб турибди.
