«Манчестер Сити» футболчиси Жереми Доку Премьер-лигадаги чемпионлик пойгаси ҳақида ўз фикрларини билдирди.

Шанба куни «Арсенал» ўз майдонида «Борнмут»га имкониятни бой берди (1:2). «Шаҳарликлар» рақобатчининг хатосидан унумли фойдаланишди ва бир кун ўтиб «Челси»ни мағлуб этишди (3:0). Натижада, Гвардиола шогирдлари «канонирлар» билан орадаги фарқни 6 очкогача қисқартиришди, бундан ташқари, манчестерликларда захирада яна битта ўйин бор. Навбатдаги турда ушбу жамоалар Манчестерда ўзаро тўқнаш келишади.

«Агар "Манчестер Сити"нинг чемпионлигига ишонмасам, мени телба деб аташ мумкин бўларди. Менимча, пойга айни авжида. Олдинда бизни ҳал қилувчи баҳс кутмоқда. Агар "Арсенал"ни мағлуб этсак — ҳаммаси ўз қўлимизда бўлади, мағлуб бўлсак — тақдир "Арсенал" ихтиёрига ўтади. Мен чемпионлик тақдирини ўзимиз ҳал қилишимизни афзал кўрардим», — дея Докунинг сўзларини келтирмоқда The Touchline.

Хосеп Гвардиола ва Микель Артета жамоалари ўртасидаги ҳал қилувчи баҳс келаси якшанба, 19 апрель куни бўлиб ўтади.