«Manchester Siti» futbolchisi Jeremi Doku Premyer-ligadagi chempionlik poygasi haqida o‘z fikrlarini bildirdi.
Shanba kuni «Arsenal» o‘z maydonida «Bornmut»ga imkoniyatni boy berdi (1:2). «Shaharliklar» raqobatchining xatosidan unumli foydalanishdi va bir kun o‘tib «Chelsi»ni mag‘lub etishdi (3:0). Natijada, Gvardiola shogirdlari «kanonirlar» bilan oradagi farqni 6 ochkogacha qisqartirishdi, bundan tashqari, manchesterliklarda zaxirada yana bitta o‘yin bor. Navbatdagi turda ushbu jamoalar Manchesterda o‘zaro to‘qnash kelishadi.
«Agar "Manchester Siti"ning chempionligiga ishonmasam, meni telba deb atash mumkin bo‘lardi. Menimcha, poyga ayni avjida. Oldinda bizni hal qiluvchi bahs kutmoqda. Agar "Arsenal"ni mag‘lub etsak — hammasi o‘z qo‘limizda bo‘ladi, mag‘lub bo‘lsak — taqdir "Arsenal" ixtiyoriga o‘tadi. Men chempionlik taqdirini o‘zimiz hal qilishimizni afzal ko‘rardim», — deya Dokuning so‘zlarini keltirmoqda The Touchline.
Xosep Gvardiola va Mikel Arteta jamoalari o‘rtasidagi hal qiluvchi bahs kelasi yakshanba, 19 aprel kuni bo‘lib o‘tadi.
