«Челси» бош мураббийи Лиам Росеньор жамоанинг муваффақиятсизликлари ҳақида гапирди. Якшанба куни «кўклар» ўз майдонида «Манчестер Сити»дан навбатдаги мағлубиятни (0:3) қабул қилиб олди. Натижада лондонликлар Чемпионлар лигаси ҳудудидан янада узоқлашишди.

«Мени тайинлашганида, кўп вақт беришларини сўрамаганман, чунки клуб қандай тузилганини, унинг анъаналари ва тарихини яхши тушунаман. Менга вақт берилишини истардим ва ишончим комилки, маълум бир сабр билан ҳақиқатан ҳам ўзига хос нарса яратиш мумкин. Пеп Гвардиола ва Юрген Клоппга «Манчестер Сити» ва «Ливерпуль» билан соврин юта олмаган пайтларида вазиятни ўнглаш учун бир йил вақт берилган. Мен январь ойида келдим. Бу баҳона эмас, балки ҳақиқат. Мен ҳозирнинг ўзида ғалаба қозонишим керак — бор эътиборимни шунга қаратганман», — дея журналист Бобби Винсент Росеньорнинг сўзларини келтирмоқда.

Эслатиб ўтамиз, йил бошида англиялик мутахассис Энцо Маресканинг ўрнини эгаллаб, 2032 йилгача мўлжалланган шартнома имзолаган эди.