«Бавария» дарвозабони Мануэль Нойер Германия терма жамоасидаги фаолиятини бош мураббий Юлиан Нагельсманн билан юзага келган зиддият сабабли якунлагани ҳақидаги хабарларни инкор этди.

«Бу мутлақо ҳақиқатга тўғри келмайди. У менинг мураббийим бўлган вақтда («Бавария»да) гаплашганмиз. Шунингдек, Еврода ҳам унинг қўл остида ўйнадим. Орамизда ҳеч қандай низо йўқ. Муносабатларимиз яхши. Бошқалар нима дейиши на мени, на уни қизиқтиради. Шу сабабли бунга хотиржам муносабатдамиз.

Мен Жаҳон чемпионатида ўйнамайман ва тайёргарлик жараёнида ҳам иштирок этмаяпман. Бор эътиборимни «Бавария»га қаратганман ва буни қайта-қайта таъкидлайман. Ушбу жамоанинг бир қисми бўлиш менга завқ бағишлайди. Олдинда бизни кўплаб муҳим ва ҳал қилувчи ўйинлар кутмоқда ва мен шунчаки жамоа билан бирга улардан лаззат олишга ҳаракат қиляпман», — деди Нойер ZDF телеканалига берган интервьюсида.