«Бавария» жорий мавсумда ҳужум чизиғида ажойиб ўйин кўрсатмоқда. Шунга қарамай, мюнхенликлар шу ёзда таркибни янада кучайтиришни режалаштиришган. Германиянинг Sky нашри хабар беришича, Бундеслига гранди Луис Диас билан рақобатлашиши учун «Ньюкасл»дан Энтони Гордонни сотиб олмоқчи.

Манбанинг маълумотларига кўра, «Бавария» ва Гордоннинг вакиллари ўртасида аллақачон аниқ музокаралар бўлиб ўтган. Бироқ мюнхенликлар АПЛ клуби билан ҳали боғланишмаган. Футболчининг «Ньюкасл» билан шартномасида уни товон пули эвазига сотиб олиш опцияси мавжуд эмас. Эҳтимолий келишув суммаси тахминан 60 миллион еврони ташкил қилиши мумкин.

25 ёшли Энтони Гордоннинг «Ньюкасл» билан амалдаги шартномаси 2030 йилнинг ўрталаригача мўлжалланган.