Лондоннинг «Арсенал» клуби собиқ ўйинчиси Жек Уилшир «Лутон Таун» бошқарувида ўзининг илк совринини қўлга киритди. 2022 йилда футболчилик фаолиятини якунлаган Уилшир мураббийлик фаолиятини бошлади — дастлаб ўзи илгари тўп сурган «Арсенал»нинг ёшлар жамоасида ишлади. Аммо кўп ўтмай, унга жиддийроқ таклифлар туша бошлади ва 2024 йилда «Норвич» клубига ўтди.
Ўтган йили эса у «канарейкалар»ни инглиз футболининг учинчи дивизионида иштирок этаётган «Лутон Таун»га алмаштирди. Ўтган дам олиш кунларида унинг клуби финалда «Стокпорт Каунти»ни 3:1 ҳисобида мағлуб этиб, илк соврин — EFL Trophy кубогига эга чиқди.
Энди жамоа олдида бошқа вазифа турибди — орадаги олти очколик фарқни йўққа чиқариш ва Чемпионшипга йўлланма берувчи плей-офф босқичига йўл олиш.
