Чоршанба куни «Бавария» Чемпионлар Лигаси чорак финал жавоб баҳсида «Реал Мадрид»ни қабул қилади. Мюнхенликлар бош мураббийи Венсан Компани ҳакамлик қарорлари ўйин натижасига таъсир қилмаслигига умид билдирди.

«Реал»га қарши ўйинда ҳамма нарса кўплаб омилларга боғлиқ бўлади. Барчаси индивидуал маҳоратдан бошланади. Шунингдек, жамоавий шиддат ва охиригача чидашга тайёрлик каби жиҳатлар бор.

Баъзида ҳакам ҳам ўйин тақдирига таъсир ўтказиб қўйиши мумкин. Умид қиламанки, бу сафар бундай бўлмайди (кулади). Айниқса, «Реал» билан ўйинда ҳар бир майда детал муҳим аҳамиятга эга. Биз ҳам руҳий, ҳам жисмоний жиҳатдан жуда яхши тайёрмиз ва бу ўйинни интизорлик билан кутяпмиз», — деди Компани журналистларга.

Эслатиб ўтамиз, Мадридда кечган биринчи учрашувда «Бавария» 2:1 ҳисобида ғалаба қозониб қайтган эди. Жавоб ўйини эртага, 15 апрель куни Тошкент вақти билан тунги соат 00:00 да бошланади. Тўқнашув ғолиби ярим финал йўлланмасини қўлга киритади.