The Athletic нашри журналистлари дунёнинг энг кучли 15 нафар дарвозабони рейтингини тузиб чиқишди. Таъкидлаш жоизки, рўйхатни шакллантиришда нафақат жорий форма, балки барқарорлик ва фаолиятнинг давомийлиги ҳам ҳисобга олинган. Шу сабабли, айрим порлаётган ёш истеъдодлар ушбу рўйхатга киритилмади.
Рейтингнинг биринчи поғонасини «Реал Мадрид» посбони Тибо Куртуа эгаллади. Муаллифлар айнан уни дунёнинг энг яхши дарвозабони деб ҳисоблашмоқда. Иккинчи ўрин «Манчестер Сити» аъзоси Жанлуижи Доннаруммага насиб этган бўлса, кучли учликни «Ливерпуль» вакили Алиссон якунлаб берди.
Рўйхатнинг давомидан қуйидаги дарвозабонлар жой олди: Мануэль Нойер, Майк Меньян, Эмилиано Мартинес, Давид Райя, Ян Облак, Жоан Гарсия, Грегор Кобель, Жордан Пикфорд, Янн Зоммер, Унаи Симон, Диогу Кошта ва Эдерсон.
