Мадриднинг «Реал» клуби ҳужумчиси Килиан Мбаппе Чемпионлар лигаси 1/4 финали доирасидаги «Бавария»га қарши жавоб учрашувида ўз маҳоратини намойиш этди.

27 ёшли француз 42-дақиқада Винисиуснинг узатмасидан сўнг рақиб дарвозасини ишғол қилди. Ушбу гол Мбаппе учун Чемпионлар лигасининг 2025/26 йилги мавсумидаги 15-гол бўлди. Шу тариқа, у аргентиналик Лионель Мессининг турнир тарихида бир мавсумда урилган голлар сони бўйича кўрсаткичини янгилаб ўтди.

Килианнинг олдида фақат Криштиану Роналдунинг рекордлари қолди. Эслатиб ўтамиз, мутлақ рекорд португалиялик юлдузга тегишли бўлиб, у 2013/14 йилги мавсумда «Реал» сафида 17 та гол урган. Шунингдек, Роналду 2015/16 йилги мавсумда 16 бор рақиблар дарвозасини ишғол қилган.

Килиан Мбаппе 2024 йилдан буён Мадрид клуби шарафини ҳимоя қилиб келмоқда, унгача эса у «ПСЖ» сафида тўп сурган.