Чемпионлар Лигаси 1/4 финалидан ўрин олган «Бавария» — «Реал» учрашуви қўшимча бўлимларга ўтиши мумкин эди. Бироқ, Эдуардо Камавинганинг майдондан четлатилиши ҳамма нарсани ўзгартириб юборди: шундан сўнг мюнхенликлар иккита гол уриб, 4:3 ҳисобида ғалаба қозонишди.
Ўйиндан сўнг «Бавария»нинг учинчи голи муаллифига айланган вингер Луис Диас ўз фикрларини билдирди:
«Менимча, Камавинга четлатилгунга қадар ҳам биз тўпни яхшироқ ҳаракатлантираётган эдик ва вазиятлар яратаётгандик. «Реал» — катта жамоа ва бундай ўйинлар учун жуда мос. Фикримча, улар яхши ўйин ўтказишди. Қачонки Камавинга четлатилганида, биз ўзимизга: «Бу бизнинг лаҳзамиз, бизнинг имкониятимиз», дедик», — деди Диас интервьюда.
Эслатиб ўтамиз, Чемпионлар Лигаси ярим финалида «Бавария» «ПСЖ» жамоаси билан тўқнаш келади.
