Мадриднинг «Реал» клуби аъзолари жорий мавсумда Европа Чемпионлар Лигасида жами 5 та қизил карточка олишди.

Бугун Мадрид жамоаси 1/4 финал жавоб баҳсида «Бавария»га имкониятни бой берди (3:4, биринчи ўйин – 1:2) ва мусобақа билан хайрлашди. Ушбу учрашувнинг ўзида «қаймоқранглилар»нинг икки футболчиси майдондан четлатилди:

Эдуардо Камавинга – Харри Кейнга ишлатилган фолдан сўнг тўпни рақибга бермагани учун иккинчи сариқ карточкани олди.

Арда Гюлер – якуний ҳуштақдан кейин ҳакам билан баҳслашгани учун тўғридан-тўғри қизил карточкага лойиқ кўрилди.

Бундан аввалроқ, умумий босқич доирасидаги «Марсель»га қарши ўйинда (2:1) Даниэль Карвахаль, «Бенфика» билан баҳсда (2:4) эса Рауль Асенсио ва Родриго майдондан четлатилган эди.

Бешта четлатиш — бу жорий мавсумда Чемпионлар Лигасида иштирок этаётган барча жамоалар орасидаги энг юқори (салбий) кўрсаткичдир. Кўриниб турибдики, Мадрид клуби нафақат натижа борасида, балки интизом масаласида ҳам жиддий муаммоларга дуч келган.