Европа футбол ассоциациялари иттифоқи (УЕФА) йўл-транспорт ҳодисаси натижасида ҳалок бўлган австриялик машҳур дарвозабон Александер Маннингернинг оиласига ҳамдардлик изҳор этди.

УЕФА сайтида Австрия футбол ассоциацияси спорт директори Петер Шёттелнинг қуйидаги сўзлари келтирилган:

«Александер Маннингер майдонда ҳам, унинг ташқарисида ҳам Австрия футболининг буюк элчиси эди. У ўзининг халқаро фаолияти билан кўплаб ёш дарвозабонларга ўрнак бўлди ва уларни руҳлантирди. Унинг профессионаллиги, вазминлиги ва ишончлилиги уни ўз жамоалари ҳамда миллий терма жамоанинг муҳим қисмига айлантирган эди. Унинг ютуқлари юксак ҳурматга лойиқ ва улар доим ёдда қолади».

48 ёшли дарвозабон фаолияти давомида «Арсенал», «Ювентус», «Фиорентина» ва «Болонья» каби клублар шарафини ҳимоя қилган. У «Арсенал» билан Англия (1997/98) ҳамда «Ювентус» билан Италия (2011/12) чемпиони бўлган эди.