Журналист ва инсайдер Давид Орнштейн «Арсенал» бош мураббийи Микель Артетанинг келажаги ҳақида ўз фикрларини билдирди.
«Унинг клубдан кетишини тасаввур қилиб бўлмайди, дейиш соддалик бўларди. Футболда ҳеч нарсага ҳайрон қолмаслик керак. Ҳозирги вақтда клубнинг уни олиб қолиш нияти тушунарли, аммо кўп нарса яқин ҳафталарга боғлиқ бўлади», — деб ёзади Орнштейн ижтимоий тармоқларда.
Артета олти ярим йилдан бери «Арсенал»ни бошқариб келмоқда, бироқ испаниялик мутахассис қўл остида «канонирлар» бор-йўғи битта йирик соврин — 2020 йилда Англия Кубогини қўлга киритишган. Шунингдек, жамоа 2020 ва 2023 йилларда Англия Суперкубогида зафар қучган. Айни дамда «Арсенал» АПЛ олтин медаллари ва УЕФА Чемпионлар лигаси кубоги учун курашни давом эттирмоқда.
