Марказий ярим ҳимоячи Лука Модричнинг «Милан» билан амалдаги меҳнат шартномаси шу йилнинг июнь ойида ниҳоясига етади. Sky Sport Italia журналисти Пеппе ди Стефано хорватиялик футболчининг итальян клуби билан ҳамкорликни давом эттиришга рози бўлиши учун иккита асосий шартни маълум қилди.
Манбанинг хабарига кўра, 40 ёшли Модрич учун Чемпионлар лигасида иштирок этиш жуда муҳим — ҳозирда «Милан» ушбу мусобақа йўлланмаси учун кураш олиб бормоқда. Бундан ташқари, ярим ҳимоячи Массимилиано Аллегри қўл остида ўйнашни истайди. Агар мутахассис клубни тарк этса, раҳбариятда Модрич билан шартномани узайтириш борасида муаммолар юзага келиши мумкин.
«Реал»нинг собиқ аъзоси «Милан» сафига 2025 йилнинг ёзида эркин агент сифатида келиб қўшилган эди. Жорий мавсумда у 34 та ўйинда майдонга тушиб, 2 та гол ва 3 та голли узатмани ўз ҳисобига ёздириб қўйди.
