АҚШ ҳукумати 2026-йилги футбол бўйича Жаҳон чемпионати арафасида европалик амалдорларга нисбатан кутилмаган чекловларни эълон қилди. Дональд Трамп маъмурияти яҳудийларга нисбатан адоват (антисемитизм) руҳида сиёсат юритаётган ёки шундай баёнотлар бераётган вазир ва етакчиларни мамлакатга киритмаслик билан таҳдид қилмоқда. Бу ҳақда Euractiv нашри хабар бермоқда.
АҚШнинг махсус вакили Ехуда Каплуннинг таъкидлашича, Вашингтон яҳудийларга қарши нафрат уйғотувчи амалдорларга “қизил карточка” кўрсатади. Бу эса улар ЖЧ—2026 ўйинларига кела олмаслигини англатади.
Каплуннинг фикрича, ҳозирда Европада яҳудийларга нисбатан адоват даражаси 1933-йилдаги ҳолатга тенглашган. Охирги ҳафталарда Бельгия, Нидерландия ва Буюк Британиядаги ибодатхоналарга ҳужумлар уюштирилгани хавотирларни янада оширган.
Хусусан, Бельгия ҳукумати яҳудий арбобларига нисбатан суд ишини бошлагани учун АҚШ томонидан кескин танқид қилинмоқда. Шунингдек, Каплун Брюсселдаги учрашувда германиялик дипломатлар билан ҳам тортишиб қолган. У Европани жиноятчилик ва нафратга нисбатан “юмшоқликда” айблаган бўлса, европаликлар бу иддаоларга эътироз билдирган.
Маълумот учун, тарихда илк бор 48 та терма жамоа иштирок этадиган мазкур Жаҳон чемпионати учта давлат — АҚШ, Мексика ва Канада ҳудудларида бўлиб ўтади. Мусобақа 11 июндан 19 июлга қадар давом этиши белгиланган.













