Грециялик мутахассис Йоргос Донис 17 апрель куни истеъфога чиқарилган Эрве Ренарнинг ўрнини эгаллаб, Саудия Арабистони терма жамоасининг янги бош мураббийига айланади. Бу ҳақда Documento портали хабар бермоқда.
Манба берган маълумотларга кўра, 56 ёшли мутахассис Саудия Арабистони футбол федерациясининг таклифига аллақачон «ҳа» деб жавоб берган. Эндиликда фақат ҳужжатларни имзолаш ва 2026 йилги жаҳон чемпионатидаги иштирокни ҳам ўз ичига олувчи ҳамкорликни расман эълон қилиш қолди.
Бундан аввал Донис Саудиянинг «Ал-Ҳилол» клубида ишлаб, 3 та совринни қўлга киритган, Кипрнинг АПОЭЛ жамоасини мамлакат чемпиони ва Кубок соҳибига айлантирган, шунингдек, қатор бошқа клубларда фаолият юритган эди. Охирги икки йил давомида Донис Саудиянинг «Ал-Халиж» клубини бошқариб келмоқда. Жаҳон чемпионатида араблар Испания, Уругвай ва Кабо-Верде терма жамоалари билан бир гуруҳдан жой олган.
