Ҳужумчи Эндрикнинг Мадриднинг «Реал» клубидан ижара асосида ўтиши ортидан Бразилияда «Лион»нинг машҳурлиги кескин ошди.
L'Equipe нашрининг хабар беришича, 19 ёшли бразилиялик футболчи жамоага келганидан бери CazéTV телеканалида «Лион» иштирокидаги ўйинлар аудиторияси ўн баробарга кўпайган ва ҳатто «ПСЖ» кўрсаткичларидан ҳам ўзиб кетган. Ўртача ҳисобда «тўқувчилар»нинг (клуб лақаби) ўйинларини Бразилияда 2,3 миллиондан ортиқ томошабин кузатмоқда.
Эндрик 1 январь куни «Лион» аъзосига айланган эди. Франция чемпионатидаги 11 та ўйинда у 3 та гол урди ва 5 та голли узатмани амалга оширди.
