Дортмунднинг «Боруссия» клуби Германия чемпионатида кетма-кет иккинчи мағлубиятини қабул қилиб олди. Шанба куни «арилар» сафарда «Хоффенхайм»га 1:2 ҳисобида имкониятни бой беришди.
Бунинг натижасида «Бавария» чемпионлик унвонига максимал даражада яқинлашди. Мавсум якунига тўрт тур қолганда Германия чемпионига айланиш учун «Бавария»га якшанба куни ўз майдонида «Штутгарт»га ютқазмаслик кифоя қилади. Ҳатто дуранг қайд этилган тақдирда ҳам, Венсан Компани шогирдлари Бундеслига турнир жадвалида бошқа жамоалар учун етиб бўлмас даражага чиқиб олишади.
«Бавария» — «Штутгарт» учрашуви 19 апрель куни Тошкент вақти билан соат 20:30 да бошланади.
