«Милан» ҳужумчиси Рафаэл Леау фаолиятини Англияда давом эттириши мумкин. La Gazzetta dello Sport нашрининг хабарига кўра, португалиялик футболчи шу ёзда Милан клубини тарк этиши кутилмоқда.

Ҳужумчи фаолиятини давом эттириши мумкин бўлган эҳтимолий манзил сифатида «Манчестер Юнайтед» номи тилга олинмоқда. Леаунинг шартномасидаги товон пули миқдори 175 миллион еврони ташкил этади. Бироқ «Милан» ўз футболчисини тахминан 40 ёки 50 миллион евро эвазига сотишга тайёр.

Жорий мавсумда Рафаэл Леау «Милан» сафида барча турнирларда 26 та ўйинда майдонга тушиб, 10 та гол урди ва иккита голли узатмани амалга оширди. Унинг «россонерилар» билан шартномаси 2028 йилнинг 30 июнигача мўлжалланган. Ҳужумчи 2019 йилда «Лилль»дан «Милан»га 49 миллион евро эвазига ўтган эди.