«Барселона» марказий ҳимоячиси Андреас Кристенсен, дастлабки рад жавобига қарамай, клубда қолиши мумкин. Даниялик футболчи «кўк-анорранглилар»нинг меҳнат шартномасини узайтириш бўйича биринчи таклифини рад этди — уни таклиф қилинган шартлар қониқтирмади. Шу билан бирга, журналист Рохер Тореллонинг хабар беришича, 30 ёшли футболчи ҳамон клубда қолишни афзал кўрмоқда ва унинг агенти тез орада Каталония гранди билан янги музокаралар ўтказади.
Кристенсеннинг «Барселона» билан амалдаги шартномаси жорий мавсум якунида ўз ниҳоясига етади. Жароҳатлар туфайли футболчи Ханс-Дитер Флик жамоасининг ушбу мавсумдаги ўйинларидан фақат 17 тасида майдонга тушди ва битта гол муаллифига айланди.
