«Манчестер Юнайтед» бош мураббийи Майкл Кэррик клубдаги келажаги ҳақида яна бир бор фикр билдирди. Шанба куни «қизил иблислар» инглиз мутахассиси қўл остида навбатдаги ғалабани қўлга киритиб, сафарда «Челси»дан устун келишди (1:0).

Мураббийнинг амалдаги шартномаси ёзда ўз ниҳоясига етади, бироқ «МЮ» раҳбарияти унинг келажаги борасида ҳали бир қарорга келгани йўқ.

«Менга бу ер ёқади, аммо вазиятни тушуниб турибман — қарор қабул қилиш менинг ихтиёримда эмас. Мен бу ишни ва бу клубни яхши кўраман, бу ерда ўзимни яхши ҳис қиляпман», — дея Кэррикнинг ўйиндан кейинги интервьюсидан иқтибос келтирмоқда Utdreport.

44 ёшли мутахассис ушбу лавозимни январь ойида, аввалроқ ишдан бўшатилган Рубен Аморимнинг ўрнини эгаллаб, қабул қилиб олган эди. «Манчестер Юнайтед» Премьер-лига финишига беш тур қолганда турнир жадвалида учинчи поғонани эгаллаб турибди.