«Реал Сосьедад» ҳужумчиси Микель Оярсабаль Испания Кубоги финалида Мадриднинг «Атлетико» клуби устидан қозонилган ғалабада жамоасига катта ёрдам берди. 28 ёшли футболчи биринчи бўлим якунида пенальтини аниқ амалга ошириб, «матрасчилар»ни хафа қилди.
Учрашувнинг асосий вақти 2:2 ҳисобида якунланди, ўн бир метрли зарбалар сериясида эса басклар жамоаси устун келди (4:3).
The Touchline нашрининг қайд этишича, Оярсабаль ўзи иштирок этган барча олтита финал ўйинида гол уришга муваффақ бўлган. Бу ноёб серия 2020 йилда, айнан Испания Кубогининг ҳал қилувчи баҳсида «Атлетик» Бильбао дарвозасига йўл топган вақтдан бошланган эди. Кейинчалик Микелнинг голларидан Бразилия олимпия терма жамоаси (Олимпиада-2020), Франция (Миллатлар лигаси – 2021), Англия (Евро-2024) ва Португалия (Миллатлар лигаси – 2025) терма жамоалари жабр кўрган.
