"Барселона" қанот ҳужумчиси Руни Барджи "кўк-анорранглилар" сафида етарли ўйин амалиётига эга бўлмаётганидан норози ва шу сабабли келаётган ёзда ижара асосида бошқа клубга ўтиш вариантини кўриб чиқмоқда. Бу ҳақда Mundo Deportivo хабар бермоқда.

Манбанинг маълумотига кўра, 20 ёшли футболчи учун асосий даъвогар "Ювентус" бўлиб турибди. Шунингдек, Барджига "Монако", "Порту" ва "Бетис" клублари ҳам қизиқиш билдирмоқда. Таъкидланишича, ушбу жамоалар швециялик ҳужумчини у 2025 йилнинг ёзида Каталония клубига ўтишидан аввал ҳам ўз сафига қўшиб олмоқчи бўлишган.

Жорий мавсумда Барджи барча турнирларда 23 та ўйинда иштирок этиб, иккита гол ва тўртта голли узатмани амалга оширди. Футболчининг клуб билан амалдаги меҳнат шартномаси 2029 йилнинг ёзигача мўлжалланган. Transfermarkt порталидаги маълумотларга кўра, футболчининг бозор қиймати 15 миллион еврони ташкил этади.